Al-Insan

Toto biabura ebise ebiinji khumundu, olwayalaali eshindu shirumbulwa tawe.

Toto efwe khwaloonga Omundu okhurulana nende imwo yobulamu, yesasania, (yomusatsa nende omukhasi) khulwokhumutema, kho nikhumukhola wo khuwulila, nende wokhulola.

Toto efwe khwamwawulila injila, niyenya achame nohomba alobe.

Toto efwe khwarecheshela abakhayi eminyororo nende tsirimba nende omulilo omululu.

Toto Abandu abalayi balinywa eshinywebwa shiasasibwamwo ‘kafura’.

Ne Isebele ya ya basumba ba Nyasaye balinywamwo, bali ikhola ikhulukusie mubunji.

Bakholanga kabalaka, ne baritsanga inyanga yobusiro bwayio buliswana.

Ne balisinjia eshilibwa, khulwo khuyanza khukhwe abamanami, nende abafwilwa nende ababoye.

Toto efwe khubalisinjia khulwokhwenya tsimbabasi tsia Nyasaye shikhubenyakhwo omurungo nohomba orio muno tawe.

Toto efwe khuritsaanga okhurulana khu Nyasaye wefu Omulesi, inyanga yobutinyu nende Omusando.

Kho mana Nyasaye alibalinda , okhurulana khubusiro bwe inyanga eyo, ne alibabukanilia nomwikhoyo nende obusangafu.

Ne alibarunga emikunda chomwikulu nende tsingubo tsianderere, khulwa okhwifwila khwabu.

Omo baliyekha khubisaala bioluyali, shibalilolamwo omubasu omululu nahomba omunjiri omululu tawe.

Ne ebinikha biliba ahambi ninabo, ne – ebiamo- bilieletsanga okhuula hasi.

Ne balitendelwa khubindu bie ifedha nende vikombe bie tsigilasi.

Bieifedha inzwenufu shinga shiwoo, biachelwa khushichelo.

Ne omo balinywesibwamwo eshinywebwa shasasibwamwo itangawizi.

Isebele iliyo ilangwa mbu Salsabil.

Ne balibotokhana okhubatenda abasiani bashili ababuukha, nobalola bange’na nge’na shinga tsisole tsiomunyanza tsisaalasibwe.

Ne noli kalola, oliba oluutsi obwokholo nende obwaami obukhongo.

Hekulu wabu khuli netsingubo tsia Hariri (tsingwalafu) tsiobukondo bwa masafu, nebalifwala emikasa chieyifedha, Ne Nyasaye wabu alibanywesia eshinywebwa eshilayi.

Toto kuno niko omurungo kwenyu ne okhukhalabana khwenyu khufuchililwe.

Toto efwe khwakhwishilia Ikurani indutu, indutu.

Kho linda okhula shingala Nyasaye wuwo omulesi alabusia, ne alaulila yesiyesi mubo owetsimbi nohomba omukhayi tawe.

Ne itsulila ilira lia Nyasaye wuwo omulesi nibushia nende nibwila.

Ne mushilo omwinamile ye, ne umwitsomie uluwono olurambi.

Toto abandu bano bachama obulamu bwokhushialo, nebalekhanga inyuma wabu inyanga isiro.

Efwe khabaloonga, ne nikhubaramwo amani, nenikhwenya khunyala okhukalukhasia abandi bali shingabo.

Toto bwene kano ni ametsulisio, ne ulia wenya atile injila itsia awa Nyasaye wuwe.

Neshimwakhenya tawe okhula Nyasaye achame, toto bwene Nyasaye niye omumanyi muno, owamamachesi po.

Yenjisinjia owayenya mutsimbabasi tsitsie, ne abamayanu yabarecheshela eshinyasio eshilulu.