Muhammad

Balia bakhaya mana nibekalila injila ya Nyasaye, ye alikosia ebikhole biabu.

Ne balia basuubila, mana nibakhola amalayi, mana nibasuubila khukeshibwa khu Mohammad , nako ni abwatoto okhurula khu Nyasaye wabu omulesi- alabaleshela tsimbi tsiabu, ne alabakaasilia obulamu bwabu.

Ako nilwokhuba mbu abakhayi baloonda obukori, ne balia abasuubila baloonda obwatoto okhurula khu Nyasaye wabu omulesi , endio nilwa Nyasaye achelasilia abandu ifwani yabu.

Ne nimubukanana nende abakhayi mukhuye amakosi kabu, okhuula shinga mubatosia mu baboye emikoye, mubalekhule khubulayi nohomba benunule, ukhula shinga liyie liwa, ne endio, Nyasaye yenyanga yakhabashilile omwene, halali yenya okhubatema abene khubeene, Ne balia berwa khunjila ya Nyasaye, shalikosia ebikhole biabu tawe.

Alabalunjisia ne alabakasilia obulamu bwabu.

Ne alabenjisia mwikulu, lia yabamanyia.

Enywe abasuubila, nimuhabina Nyasaye, yesi alabahabina, ne alatinyia amakulu kenyu.

Ne balia bakhaya, khubo ni okhutiba , ne alikosia abikhole biabu.

Endio nilwokhuba mbu basila aka Nyasaye yeshia mana nakwisia ebikhole biabu.

Shibachendakhwo khusialo, balola indukho yabalia bali imbeli wabu, Nyasaye yabasishia, ne khu abakhayi bano, baliba shinga bo.

Endio nilwokhubeela Nyasaye nomulindi wabasuubili, ne toto abakhayi babula omulindi.

Toto Nyasaye alinjisia abasuubila mana nibakhola amalayi mwikulu mumikunda chiburangamwo emialo, Ne balia bakhaya bekhoyanga nibalia shinga ebiayo biliitsanga, ne mumulilo nishio eshimenyo shiabu.

Ne tsingongo tsinga tsiali na amani amanji okhushila olukongo lulwo luno lwakhutafia, khwabasishia ne abalaho wabahabina.

Koo ulia uli nende obulafu okhurula khu Nyasaye wuwe, alishinga ulia wokaasilibwa amabii keke akalole amalayi, mana nibaloonda okhwenya khwabu.

Emikunda cho mwikulu charecheshelwa abamuria, emialo chilimwo amatsi kabulamwo obutukhulu, nende emialo cha mabeela kalaboyanga tawe, nende emialo cha amalwa keshiuya khubanywi, nende emialo chiobuushi obulafu tswe, ne balimwo nende tsimbia tsiosi tsebiamo, nende obulesheli okhurula khu Nyasaye wabu, bakhaba shinga baliba mumulilo tsinyanga tsioosi, nibanywesibwa amatsi kayile pia, nikateta amala kabu.

Ni mubo baliwo bakhurechelesinjia, mana nibarula ewuwo, bareebanga balia bahebwa obumanyi mbu: “ Nishina shiayakhaboola bulaano ?, Abo nibo ba Nyasaye yopa eshimanyisio khu mioyo chiabu, mana nibaloonda okhwenya khwe mioyo chiabu”

Ne balia baalunjikha yabameta obulunjifu mana nabanyalila okhumuria.

Balinende shiabalindaga halali ni indukho ilibapwoka, Ne toto ebimanyisio biayo biamala okhwitsa, ne niyula indukho okwitsulila khwabu khulibakhonya shina ?

Ne manya mbu abulaho okhuyeshele okhulaamwa khubwatoto halali Nyasaye, Ne saba eshileshelo khutsimbi tsitsio, nende khubasuubili beshisatsa nende abasuubili abeshikhasi , Ne Nyasaye yamanya habundu wenyu okhutsa nende okhukalukha, nende habundu wenyu weshimenyo.

Ne abasuubila baboolanga mbu : “shichila shina nileshibwa isura,” ne niyishibwa isura yelilako mana barumbulamwo okhupana, olalola balia bemioyo chiabu chilimwo obulwale, bakhuhenganga shinga ulia womwoyo kukwe kurula nafwitsanga, halali nobulayi khubo,

Okhuwulila nende amakhuwa amalayi, Ne likhuwa nilimalile okhusuubilwa, ne nibaba abatoto khu Nyasaye bulaba ubulayi khubo.

Ne kasuubililungwa khwinywe mbu nimunyoola obunyali ni mukhola amabii khushialo nende okhwira olwikho.

Abo nibo ba Nyasaye yatsuba, mana nabekasia amarwi, ne niyoofusia tsimoni tsiabu.

Ne shibaparangakhwo Ikurani ino tawe, nohomba emioyo chiabu chilikhwo amakafuli kachio.

Toto balia bakalukha inyuma nibakhamala okhumanya obulunjifu, shetani yabakosia nabakatia.

Ako nikhulwokhuba mbu baboola balia balenyanga okhuwulila aka Nyasaye yeshia mbu: “khitsa okhubawulila mumakhuwa kandi,” Ne Nyasaye amanyile akefisile mumioyo chiabu.

Ne kaliba karie olwa Abamalaika balibafwisia, nibaboopa obweni bwabu nende emikongo chiabu.

Ako nilwokhuba mbu balooonda kasinyisia Nyasaye ne nibakhaya kamusangasia, mana nakwisa ibikhole biabu.

Nohomba baparanga balia abali no bulwale mumioyo chiabu mbu Nyasaye shalira habulafu obusuku bwabu tawe.

Ne khwenyanga khwakhakhwechesiye bo, ne wakhabamanyile khu ebimanyisio biabu, ne wakhabamanyile khukhulomaloma khwabu, Ne Nyasaye yamanya muno ebikhole bienyu.

Ne toto khulabatema okhula khumanye abalwani khunjila ya Nyasaye mwinywe, nende abesumilisi ne khulabatema mumakhuwa kenyu.

Toto balia bakhaya mana nibekalila injila ya Nyasaye, mana nibayingania Omurumwa, niyakhamala okhubahelesia obulunjifu, shibalikhola Nyasaye eshindu tawe, ne alikwisia ebikhole biabu.

Enye abasuubila muwulile Nyasaye nende Omurumwa ne mulanyasia ebikhole bienyu tawe.

Toto balia bakhaya mana nibekalila injila ya Nyasaye mana nibafwa nibali abakhayi Nyasaye shalibaleshela tawe.

Mana mulatendeya mwenya omulembe tawe ne enywe nenywe balashila, Ne Nyasaye ali ninanyu, ne shalabeema omurungo kwebikhole bienyu tawe.

Toto obulamu bwokhushialo nomubayo nende okhukalilisia, ne ni musuubila mana mwaria Nyasaye alabahelesia omurungo kwenyu ne shalabareba emiandu chienyu tawe.

Ne nabareba , mana abatilile, muleemana, ne alarusia obusuku bwenyu habulafu.

Enywe ano mulangungwa murusie khu injila ya Nyasaye, ne mwinywe balimwo bemananga, ne wimana yeyimanga omwene, Ne Nyasaye no muyinda nanyu muli abatakha, ne nimukhaya Nyasaye alarera abandu bandi balali enywe, mana bakhaye okhuba shinga enywe.