Fatir

Oluyali lwoosi ni lwa Nyasaye owaloonga likulu nende eshialo , owakhola Abamalayika abarumwa betsibaya tsibilitsibili,nende tsitaru tsitaru nende tsine tsine. Ametanga khukhulonga shinga yenya. Toto Nyasaye ni omunyali wabuli eshindu.

Tsimbabaasi tsia Nyasaye yekulila abaandu abulaho unyala okhutsiikalila , ne etsia yekalila abulaho unyala okhutsirera nalaliye tawe,naye niwa amaani owamachesi muno.

Enywe Abandu yitsulile tsimbabaasi tsia Nyasaye khwinywe. Koo aliho omuloonji wundu owulali Nyasaye owubahelesinjia omukabo okhurula mwikulu nende mwiloba? Abulaho ulamungwa khubwatoto halali ye butswa. Kho mukalukhanibungwa hena?

Ne nibakhuyingasia bamala okhuyingasibwa Abarumwa balia abaali imbeli wuwo, ne amakhuwa koosi kalikalusibwa khu Nyasaye.

Enywe Abaandu toto indache ya Nyasaye niya habwene, kho obulamu bwokhushialo bulakhukatia tawe, nohomba alakhukatia omubeyi omukhongo ulia khu Nyasaye tawe.

Toto Shetani ni omusuku wenyu, kho mumukhole omusuku, ne toto ye alanganga omukanda kukwe okhuba mubandu bomumulilo.

Balia bakhaya baliba nende eshinyaasio eshilulu, ne balia basuubila mana nibakhola amalayi balinyoola eshileshelo nende omurungo omukhongo.

Ne ulia waronelwa ebikhole bibie ebibii, mana nabilola okhuba ebilayi, toto Nyasaye alekhanga owayenya okhukora okore, ne alunjisinjia owayenya , kho omwoyo kukwo kulafwa okhubeela okhubabelela tawe, toto Nyasaye amanyile muno kabakholanga.

Ne Nyasaye niye uyilanga omuyeka mana kusakasie amaleesi, mana kukoosie khushialo shiafwa, mana nikhulamusilia khuko liloba nilimalilenje okhufwa, ne ni endio nilwa okhulamusibwa mubafu (khuliba).

Ulia wenya obukhoongo, (amanye mbu) obukhoongo bwoosi nibwa Nyasaye, khuye amakhuwa amalayi kamuulilanga, ne eshikhole eshilayi ashininia. Ne balia bakholanga ebifwanga biamabii balinyoola eshinyasio eshilulu, ne ebifwanga biabu bilitsia akhaya.

Ne Nyasaye yabaloonga enywe okhurula khuliloba.. mana nende okhurulana nende indonyaande yamatsi kolwibulo mana nabakhola okhuba abasatsa nabakhasi, ne omukhasi yesiyesi shachinganga inda nohomba shiyebulanga tawe halali khubumanyi bubwe. Ne shahelesibwa olubaka lwokhumenya nohomba akhutuyilibwa olubaka lulwe tawe, halali koosi kali mushitabu. Toto ako ni amaangu khu Nyasaye.

Ne tsinyanza tsibili tsino shitsiakhaba nashilala tawe, ino niyamaatsi amamilimili keshiuya,nokanywa kakholomokha obulayi khumwoyo, ne eyindi eyo nikeyeichumbi amalulu. Ne okhurula mukoosi mulitsangamwo inyama inzelemu, ne murusinjiamwo ebirone biamwifwalanga, ne olalolamwo amaaro nikakhalakaniamwo kho mukhaabemwo tsimbabaasi tsitsie, ne khomunyoole okhupa orio.

Yenjisinjia eshilo mushitere ne yenjisia eshitere mushilo, ne yakhola eliuba nende omwesi okhumuwulila, biosi bichendanga okhula ebise biarebwaho. Oyo niye Nyasaye Omulesi wenyu owuli nende obwami . Ne balia abamulaamanga abalali ye, babula shiosi shiosi kata shinga olububi lweyitende.

Nimubasaba shibalabawulila amasayo kenyu tawe, nekata nibabawulila shibalabakalusia tawe, ne inyanga yeyindukho balibeekana okhubatsokasia khwenyu okho. Ni abulaho wakhakhuboolela shingala kali Omumanyi wakoosi tawe.

Enywe abandu, enywe muli abatakha khu Nyasaye , ne Nyasaye niye omuyinda witsoomibungwa muno.

Ne niyenya nabarusiaho narera ebilonje bindi ebiyakha.

Ne likhuwa elo shilili litinyu khu Nyasaye tawe.

Ne Omundu shalichinga omusiko kwo uwundi tawe, ne ulia uliyingwa okhuchinga shalichinjilwa kata hatiti tawe, kata nali omwikho wuwe. Toto ewe wikanyilisinjia balia abaritsanga Nyasaye wabu omulesi nabo nibashili okhumulola ne balumililanga okhulaama (iswala) ne ulia witswenula yetswenulilanga omwoyo kukwe omwene , ne amakalushilo kali khu Nyasaye.

Ne shibakhaba nashilala omuwofu nende ulolanga tawe.

Nohomba eshilima nende obulafu.

Nohomba eshinikha nende obubafu.

Ne shibakhaba nashilala abalamu nende abafuu tawe. Nyasaye awulilisinjia owayenya , nawe shonyala okhuwulilisia bali mubilindwa tawe.

Ewe oli butswa omwikanyilisi.

Toto efwe khwakhuruma khubwatoto obe omusuubisia nende omwikanyilisi. Ne kubulaho omukanda kwosi kwosi okhula omwikanyilisi yoolamwo.

Ne nibakhuyingasia bamala okhuyingasibwa balia abali imbeli wuwo, Abarumwa babu babetsela nende ebifune bili habulafu nende mutsimbapulo nende ebitabu biobulafu.

Mana nendila balia bakhaya. Mana eshinyasio shianje shiali shirie?

Koo shololangakho mbu Nyasaye yeshinjia amatsi okhurula mwikulu mana nikhukarusilia ebiamo bikabukhane obukondo bwabio, ne mutsingulu khulimwo nende tsinyaali tsindafu nende tsinzakhanyu, etsiobukoondo bukabukhane, ne etsindi tsimali muno.

Ne mubandu nende tsisolo tsimoolanga nende tsisolo tsindi tsikabukhane obukondo, endio, Toto balia baritsanga Nyasaye mubasumba bebe nibalia abamanyi. Toto Nyasaye niwa amaani omulesheli muno.

Toto balia basomanga eshitabu shia Nyasaye mana nibalumilila okhulaama mana nibarusia eshihanwa khubilia ebiakhubakabile mubwifisi nohomba mubwang’ang’u basuubilanga inganga eyilalisikha tawe.

Kho abarunge omurungo kwabu omulaamba , nende okhubametela okhurula khu tsimbabaasi tsistsie . toto ye ni Omulesheli muno owokhupa orio inyinji.

Ne eshitabu shiakhwakhwishila mubufimbuli nishio eshiatoto , shifuchilisania nende bilia abialiho imbeli washio, toto Nyasaye yamanya muno abasumba bebe ne abalolanga muno.

Mana nikhuhelesia eshitabu balia abakhwawula mubasumba befu, ne mubo baliho bakholela obubii emioyo chiabu ne balimwo bali hakarikari, ne mubo baliho belushilanga amakhuwa amalayi, khubuchami bwa Nyasaye, obo nibo obulayi obukhongo.

Emikunda chilaliwa tawe baliinjilamwo balironwa ebirone bieyidhahabu nende ilulu,ne ebifwalo biabu mwo biliba bia hariri.

Ne baliboola mbu : “oluyali lwosi nilwa Nyasaye owakhurusiliaho eshibeela , toto Nyasaye wefu ni Omulesheli muno owokhupa orio inyinji.”

Ulia owakhurera efwe inzu yokhwikhalamwo tsinyanga tsiosi, khutsimbabaasi tsitsie shikhulinyoolamwo okhusanda tawe neshikhulinyoolamwo obuchonyi bwosi bwosi tawe.

Ne balia bakhaya balinyoola omulilo kwa jahanam, shibalibusilibwa okhufwamwo tawe, ne shibalitutuyilibwa eshinyasio shiakwo tawe, ne endio nilwa khulirunga buli omukhayi.

Ne omo balikhupamo obuyoka: “Nyasaye wefu omulesi khurusiemwo khwitsa okhukhola amalayi kalali kalia akakhwakholanga” “shikhwabahelesiamwo ebise biomundu okhwitsulila mana omwikanyilisi nabetselamwo, kho mana mupile, ne ababii babula ubahabina.”

Toto Nyasaye nomumanyi wakefisa komwikulu nende khushialo, toto ye nomumanyi muno khukali mumioyo.

Ye niye wabakhola okhuba abalindi bokhushialo, kho ulia ukhaya buli khuye obukhayi bubwe , ne shibumetelanga abukhayi okhukhaya khwabu khu Nyasaye halali okhusilwa, ne okhukhaya khwabakhayi shikhubametanga shiosi shiosi tawe halali okhusikha.

Boola mbu : “ mulolangakhwo abamusanjinjia benyu abo abamulaamanga habundu wa Nyasaye, munzechesiekhwo nibuleka shina yokhushialo yabaloonga , nohomba balikho nende obusanji bwosi bwosi mwikulu? Nohomba khwabahelesia eshitabu mana bali nende ebifune bili habulafu.? Ne abamabii shibalakananga halali obubeyi butswa.

Toto Nyasaye niye wikalilanga likulu nende ashialo bikhaye okhurulaho ne nibirulaho abulaho wakhabikalila halali ye, toto ye ni omuholo omunji wobulesheli muno.

Ne betsuba khu Nyasaye eshitsubo shiabu eshikhongo mbu: “omwikanyilisi nabetsela mbu balaba abalunjifu muno okhushilakhwo omukanda kundi kwosi kwosi.” Ne olwa omwikanyilisi yaboolela shiyabametela shiosi shiosi tawe halali obukhayi.

Khulwa okhufura khwabu khushialo, nende okhukhola ebifwanga ebibii ne ebifwanga ebibii shibikalushilanga halali khu ulia wabikhola. Ne shibalindanga tawe halali omulukha kwa balia abaranjilila khale, ne sholanyoola abukabukhani khumilukha chia Nyasaye tawe, nohomba sholanyoola abukalukhasio khumilukha chia Nyasaye tawe.

Koo shibachendangakhwo khushialo mana balolakhwo shinga indukho yabalia bali imbeli wabu yali irie, ne bali nende amaani muno okhushila bo? Ne shibulaho shinyala okhushila Nyasaye mwikulu nende khushialo. Toto ye ni omumanyi muno omunyali po.

Ne Nyasaye abukulilanga abandu khukabakholanga , shiyakhaleshelekhwo khushialo khuno isolo yosiyosi tawe,halali ababikhanga okhula ebise biarebwaho, ne olwebise biabu biliula (balirungwa) toto Nyasaye alolanga muno abasumba bebe.