Al-Hadid

Bimwitsoominjia Nyasaye bili mwikulu nende mushialo naye niye Owa amani, Wamachesi muno.

Nobubwe obwami bwo mwikulu nende khushialo, Niwelesinjia obulamu ne niye ufwisinjia, naye ni omunyali wabuli eshindu.

Ye niye owambeli na niye wokhumalilikha naye niye owahabulafu nende owulalolekha, naye niye omumanyi wabuli eshindu.

Niye woloonga likulu nende eshialo, khutsinyanga sita, Mana naleeng’ana khu shisaala, yamanya shinjilanga mwiloba nende shirulangamwo, nende shikholomokhanga okhurula mwikulu nende bininanga hekulu, Naye alininanyu wosiwosi wamuli. Naye Nyasaye alolanga muno kamukholanga.

Obwami bwo mwikulu nende khushialo nobubwe, ne ewa Nyasaye ni amakhuwa koosi kakalusibwa.

Yenjisinjia eshilo mushitere, ne yenjisinjia eshitere mushilo, naye niye umanyile muno akali mubilifu.

Suubile khu Nyasaye nende Omurumwa wuwe, ne murusie khubia Nyasaye yamukhola okhuba abaliindi , Kho balia basuubila mwinywe, mana nibarusia baliba nende omurungo omukhongo.

Ne muli murie mula suubilanga khu Nyasaye ne Omurumwa abalaanganga, mbu musuubile khu Nyasaye wenyu, naye toto yamala okhubukula indache yenyu, toto nimuli abasuubili.

Ye niye wishilinjia Omusumba wuwe tsinyaali thsinoosinjia, kho thsibarusie mushiilima nithsibeenjisia mubulafu, Ne toto Nyasaye khwinywe ni Omwihotselefu Owobukoosia muno.

Muli murie mularusinjia khunjila ya Nyasaye, ne nibiaNyasaye biosi bili khushialo nende mwikulu, shibali nashilala tawe owayiinia mwinywe nikhushili okhufungula Makka, mana nalwaana, abo bali nende omurungo omukhongo okhushila balia bayinia Makka niyikulwe, mana nibalwana, ne boosi Nyasaye yabalaka amalayi, Ne Nyasaye amanyile koosi pe kamukholanga.

Ni wina wiwosia Nyasaye likofi lilayi, mana amurunge omurungo kumeteshe, ne anyoole omurungo kwobuhaani.

Inyanga yolilola abasuubili abasatsa nabakhasi, obulafu bwabu buli imbeli wabu, nende omukhono kwabu omusaatsa, omwikhoyo kwenyu lelo, emikundu chiburangamwo emialo , mulikhalamwo tsinyanga tsiosi, okho nikho okhubura okhukhongo.

Inyanga ya abeshikhabili abeshisatsa nende abeshikhasi baliboolela abasuubili mbu: mukhuliinde khunyoole okhulolela obulafu bwenyu. lisisi lilirebwa hakari wabu lio muliango – mkari nikwetsimbabaasi na elwanyi nikweshinyasio.

Balibalaanga nibababoolela mbu: Abayiee shikhwali ninanyu ? balibaboolela mbu: Nabweene, halali enywe mwechemela abeene nimukanakana, nimuba neshibeyibeyi ne obwikombi bwe mioyo chienyu nibumukosia, okhula shingala Nyasaye wuwo abusiye, mana omubeyi nababeya okhukhaya okhuloonda Nyasaye.

Toto nyanga ino sishibukulwa shiosi shiosi khwinywe shokhubanunula tawe, nohomba balia abakhaya , eshimenyo shienyu ni mumulilo, nimwamukhoyeshele, ne amakaloshilo amabii kamakana.

Ne koo ebise bishili okhula khubasuubila emioyo chiabu chihotselesie khulwokhwitsulila Nyasaye nende khulwa amakhuwa ka toto keshibwe? Ne balaba shinga balia abahebwa eshitabu bali imbeli wabu, nibaba nende ebise ebirambi, imioyo chiabu nichiba emiumilano, ne obunji bwabu nibaba abetsimbi.

Manye mbu Nyasaye alamusinjia liloba nilimalile okhufwa, toto khubenoosiye ibimanyisio biefu khomunyoole okhupara.

Toto balia abobwatoto abasatsa nabakhasi, Bewosinjia Nyasaye likofi lilayi, balimetelwakhwo muno, na balinyoola omurungo kwobuhani bwabu.

Ne balia baasuubila Nyasaye nende Abarumwa bebe abo nibo abobwatoto, nende abaloli khu Nyasaye wabu omulesi, balinyoola omurongo kwabu nende obulafu bwabu, ne balia bakhaya, nibaingasia ebimanyisio biefu, abo nibo abandu bomumulilo.

Manye mbu obulamu bwokhushialo nomubayo nende okhukalilisia, nende okhwirona nende okhwilaya mwinywe nende okhushilana khumiandu nende abaana, bili shinga ifula, yemimela chiabu chisangasia abalimi, mana chitse chiume chikalukhane namabuyu mana chibe amasakaria, Ne mwikulu khuli neshinyasio nende obulesheli nende okhufuchililwa okhurula khu Nyasaye, Ne obulamu bwokhushialo sinishiosishiosi tawe halali omwikhoyo kwobubeyi.

Ilushile eshileshelo shia Nyasaye wenyu omulesi, nende omukunda kwomwikulu uburakalafu bwakwo bulishinga oburakalafu bwo mwikulu nende eshialo, kwarecheshelwa abasuubila Nyasaye nende abarumwa bebe, etso nitso tsimbabaasi tsia Nyasaye yelesinjia owanyenya, Na Nyasaye ali netsimbaasi tsinyinji.

Ne amasila kosikosi shimwakhanyoola khushialo nohomba mwinywe halali kwamala okhuhandichila mushitabu ,nikhushiili okhubaloonga, toto ako khu Nyasaye ni amangu.

Khomukhaye okhubeelela khushikorere mwinywe, ne mukhaye okhwilola khushiabahelesiye ne Nyasaye shiyachama ulia wibulisinjia ni yelola tawe.

Balia bemananga ne balomesinjia abandu okhuba abeemani, ne ulia ukhaya amanye mbu Nyasaye niye Omuyinda Owitsomibwa muno.

Ne toto khwaruma Abarumwa befu nende bimanyisio binoosia, ne nikhubeshilia eshitabu nende eshichelo, kho abandu beme khubwatoto, ne nikhwishia eshichuma shia amani amanji nende obukhoonyi khubandu, kho Nyasaye amanye ni wina umuhabina nende abarumwa bebe khumakhuwa kefisile, toto Nyasaye niwa amani Omushili muno.

Ne toto khwaruma Nuhu nende Ibrahim mana nikhura mulwibulo lwabu oburumwa nende eshitabu, mana khuli nende abasuubila mubo, ne abaanji mubo ni abakori.

Mana nikhubalondiakhwo Abarumwa abaanji inyuma wabu, ne nikhulondiakho Yesu Omwana wa Mariam, ne nikhumuwa injili, ne nikhura mumioyo chabaloondi be eshisa nende tsimbabaasi, nende “ obusirasoti” abeene nibo bachachia, sikhwa balachila ako tawe, halali okhukonya tsimbabaasi tsia Nyasaye, halali shibaalondanga kenyekhana tawe. Mana balia basuubila mubo khwabawa omurungo kwabu, ne abanji mubo nabonooni.

Enywe abasuubila rie Nyasaye ne musuubile Omurumwa wuwe, yetsa akhubahelesia emikabo chibili mutsimbaasi tsie, ne alabahelesia obalafu bwokhuchendela, ne alabaleshela naye Nyasaye ni omunji wetsimbabaasi.

Kho abandu beshitabu bamanye mbu babula obunyali khutsimbabaasi tsia Nyasaye, ne tsimbabaasi tsiosi tsili mumukhono kwa Nyasaye ahelesinjia owayenya, Ne Nyasaye niwetsimbasi tsinyinji.