Al-Jathiyah

Ha mim.

Okhwishibwa khweshitabo shino khurula khu Nyasaye Owaamani Owamachesi muno.

Toto khulikulu nende khushialo ebimanyisio bilikhwo khubalia abasuubila.

Nende mukhuloongwa khwenyu nende tsisolo tsiayaswaania ebimanyisio bilimwo khubandu basuubilanga.

Ne okhubusania khweshilo nende eshitere nende omukabo kwa Nyasaye yeshinjia okhurula hekulu, mana nalamusia eshialo okhurula mulifwa liashio , nende okhubotokhana khwomuyeka, ebimanyisio bilimwo khubandu bali nende amachesi.

Tsino ni tsinyaali tsia Nyasaye khukhusomelanga khubwatoto, ne makhuwa shina kabanyala okhusuubila nikalali ka Nyasaye nende ebimanyisio bibie?

Eshinyasio eshilulu shilinyoola buli ulia Omubeyi Omwonooni.

uwulilanga tsinyaali tsaNyasaye nitsisoomwa khuye, niyekhulumamia khukalia kayakaywa niyelola opara mbu shi atsiwulilekhwo tawe, kho musuubisie eshinyasio eshilulu.

Ne namanya eshindu shiosi shiosi mutsinyaali tsiefu ne akhonga omubayo, abandu abo nibo baliba nende eshinyaasio shiokhututuyibwa.

Inyuma wabu ni Jahannam, kabakhola shikalibakhoonya shiosi shiosi tawe, nohomba balia babakhola okhuba Nyasaye, ne baliba neshinyasio eshikhongo.

Buno ni obulunjifu, ne balia bakhaya ebimanyisio bia Nyasaye wabu omulesi balinyoola eshinyasio shioburuma eshilulu.

Nyasaye niye wakhola inyanza ibarumushile kho ebininwa bichendemwo khubunyali bubwe, ne mukhabemwo omukabo kukwe, kho munyoole okhumwitsoomia. (okhupa orio.)

Niye wakhola bibarumushile ebili mwikulu nende mushialo bioosi okhurula khuye , toto mu ako khulimwo nende ebimanyisio khubandu baparanga.

Boolela abasuubila mbu baleshele balia abalasuubilanga tsinyanga tsia Nyasaye, kho anyoole okhubarunga abandu khukabakholanga.

Ulia ukhola amalayi yekholela omwene ne ukhola amabii kali khuye , mana mulikalusibwa ewa Nyasaye wenyu Omulesi.

Ne toto khwahelesia abaana ba Israeil eshitabu nende amalako nende Aburumwa, mana nikhubakaba emikabo emilayi , nenikhubakholela obulayi muno okhushila mubandu boosi.

Mana nikhubahelesia amalako kalolekha kali habulafu, ne shibawukhana tawe halali nibakhanyoola obumanyi, khulwe ishinda yali hakari wabu. Toto Nyasaye wuwo Omulesi alibakabula inyanga yeyindukho khukabawukhananga.

Mana nikhukhura khunjila ya makhuwa kano kho iloondekhwo, ne olalonda obwikombi bwa balia balamanyile tawe.

Abo shibalikhukhonyakhwo shiosi shiosi imbeli wa Nyasaye tawe, ne toto abonooni ni abetsa abeene khubeene,ne Nyasaye ni Omwitsa wabalia bamuria.

Bino ni ebimanyisio bia Abaandu okhulolelakhwo nende obulunjifu nende tsimbabaasi khubandu bali nende obwatoto.

Nohomba abakholi betsimbii baparanga mbu khwakhabakhole shinga balia abasuubila mana nibakhola amalayi nashilala okhumenya khwabu nende okhufwa khwabu? ni obubii buli burie bwababusinjia.

Ne Nyasaye yaloonga likulu nende eshialo khubwatoto, ne khobuli omundu arungwe khukayakhola, nabo shibalikholelwa obubii tawe.

Koo walolakhwo ulia wakhola obwikombi bubwe okhuba Nyasaye wuwe, mana Nyasaye namulekha akore, kata nali nende obumanyi, mana nara eshimanyisio khumarwi keke nende khumwoyo kukwe,ne nara khutsimoni tsisie eshilima, kho owakhamulunjisia niwina nalali Nyasaye, shimwitsulilanga khwo?

Ne baboola mbu: “ buno ni obulamu bwokhushialo,khufwitsanga ne khumenyanga, ne shibulaho shikhusishia tawe halali tsinyanga,” ne babula obumanyi bwako, halali baparanga butswa.

Ne nibasomelwa tsinyaali tsiefu tsiahabulafu babula eshifune halali baboola mbu : “lamusiekhwo bapapa befu nikali mbu muboolanga akatoto.”

Boola mbu: “ Nyasaye niye ubalamusinjia khandi niye ulibafwisia, mana alibakhung’asia inyanga yeyindukho ibulamwo obukanakani, halali abandu abaanji shibamanyile tawe.

Ne obwaami bwomwikulu nende khushialo nibwa Nyasaye, ni inyanga yeyindukho olwa yiliula abonooni balisikha.

Ne olilola buli omukanda nikusikame hasi, buli omukanda kulangwa okhutsia okhusoma eshitabu shiakwo, “lelo mularungwa kamwakholanga.””

Eshitabu shiefu shino shiboola khwinywe kobwatoto, toto efwe khwahandikanga akamwakholanga.

Ne balia basuubila mana nibakhola amalayi Nyasaye wabu omulesi , alibenjisia mutsimbabaasi tsitsie, okho nikho obura khwahabulafu.

Ne balia bakhaya baliboolelwa mbu: “ shimwasomelwakhwo tshinyaali tsianje mana ni muba nende obufuru mumioyo chienyu, mana nimuba abandu bobwonooni.?”

Ne olwa liliboolwa mbu: “ indache ya Nyasaye niyahabwene ne ebise bibula tsinganakani “ nanyu nimuboola mbu : “khukorerwe indukho eyo, khuparirisinjiakhwo butwsa, ne khubula obwatoto.”

Mana obubii bwabakhola bwakhabaloleshele, ne kalibabotokhana akabetseshelesinjia.

Balibolelwa mbu: “olwalelo khubebilila shingala enywe mwebilila omukhung’ano kweyinyanga yenyu ino” eshimenyo shienyu nimumulilo” ne mubula ubahabina.

Khulwo khuba enywe mwatseshelela tsinyaali tsia Nyasaye mana obulamu bwokhushialo nibubakatilisia . kholelo shibalirusibwamwo tawe nohomba shibalileshelwa tawe.

Oluyali nilwa Nyasaye Omulesi we likulu , Omulesi weshialo omulesi webilonjo biosi.

Ne obukhongo ni obubwesa yenyene, mwikulu nende khushialo, naye ni owamani omuchesi muno.