Enywe Abandu murie Nyasaye wenyu Omulesi wenyu owabaloonga okhurula khumundu mulala ne naloonga okhurula khu Omundu oyo omukhasi wuwe, mana natsukha okhurulana nende balili abo Abasatsa nende Abakhasi abaanji. Ne murie Nyasaye awamusabananga khuye, nende (muliinge) abeekho. Ne toto Nyasaye nomulindi wenyu.

Ne muhelesie abaana abafwilwa omwandu kwabu, ne mulakalukhasia eshibi khushilayi tawe. Ne mulalia omwandu kwabu halala nende okwenyu tawe, toto koosi ako ni obwoononi obukhoongo.

Ne nimurire mbu shimulakhola obuleng’aafu khubaana abafilwa tawe.(mana khandi murie okhukhaya okhukholela obuleng’aafu khubakhasi) mana muteshie abamuchamisiye mubakhasi, babilii nohomba bataru, nohomba bane, ne ni muria mbu shimunyala okhukhola obuleng’aafu mana muteshie mulala butswa, nohomba balia bemikhono chienyu emusatsa chibatilile, eyo niyo injila yahambi muno khwinywe ichile mube hale nende okhukhaya okhukhola obufuru.

Ni muhelesie Abakhasi omurungo kwabu kuli mbu ni eshihanwa. Ne nibabahelesia eshindu mumurungo kwabu oko, mubuchami bwabu, awo mulie mubusangafu, mumwikhoyo.

Ne mulahelesia obunyali bwokhwikhoonyela omwandu kwa Nyasaye amukholele okhuba injila yenyu yokhwikhonya, balia babula obunyali bwobwongo bwokhulinda omwandu. Kho mubalisie mana mubafwale obulayi butswa, ne muboole ninabo amakhuwa amalayi.

Nemuteeme abaana abafwilwa ukhula shinga boola ulubaka lwokhuteshia. Nenimubanyoola mbu nabachesi, mubahelesie omwandu kwabu. Ne mulakulia mayuyukhana nohomba mayungubala tawe shichila betsa okhuba Abandu abakhongo. Ne ulia uli omuyinda yeyikalile- okhulia omwandu oko- ne omumanani alie khushichelo shie lilako lilaka. Ne nimubahelesia omwandu kwabu mureo abaloli, Ne Nyasaye ayela okhuba Omubali.

Abasatsa bali nende omukabo khushiabebusi balekhanga nende abeekho abahambi. Ne abakhasi boosi bali nende omukabo khushiabebusi balekhanga nende abeekho abahambi. Shibe shititi nohomba eshiinji omukabo kwalachilwa.

Ne ebise biokhukaba, abeekho nibabao nende abafwilwa nende abamanani mubahelesie khumwandu kwokhuchelama oko, ne mubaboolele amakhuwa amalayi.

Ne barie (abemelisi okhukholela abaana abafwila obubii, ne betsulile mbu) boosi banyala betsukhana nibalekha inyuma wabu olwibulo oluteshele baluyendela. Kho mana bo barie Nyasaye ne baboole amakhuwa kali habwene.

Toto balia balitsanga omwandu kwa baana abafwilwa khububi. Toto abo balitsanga mutsinda tsiabu omulilo, ne baliinjila mumulilo kwakhanga.